Майтүбек ауылдық клубында «Тың – ұрпақтар сабақтастығы» атты жылы шырайлы, әсерлі кездесу өтті. Шара өткен мен бүгінгіні біріктіріп, тың игеру тарихына тағзым ретінде ұйымдастырылды.
Кездесуге Май ауданының әкімі Қадылжан Сәтиев қатысып, тың игеру жылдарының ардагерлері, аудан мектептерінің жоғары сынып оқушылары мен студенттері жиналды.
Аудандық кітапхана әзірлеген кітап және фотокөрме көпшіліктің қызығушылығын тудырды. Кітап беттері мен ескі фотосуреттерде тыңды игеруге үлес қосқан жандардың бейнелері қайта тірілгендей болды. Олар – болашаққа сеніп, маңдай терімен жер жыртқан, тарих жазған еңбек ерлері. Бұл суреттер мен кітаптар – олардың ерлігі мен туған жерге деген махаббатын еске салатын шынайы куәсі.
Көрмені қазіргі ауыл шаруашылығы жетістіктерін көрсететін көрме толықтырды. Онда бүгінгі еңбеккерлердің – аға буын ісін лайықты жалғастырып жүрген жандардың жетістіктері көрсетілді.
Шара аясында ардагерлер мен белсенді қатысушылар марапатталып, музыкалық қойылымдар орындалып, көрермен жүрегіне алғыс пен ұрпақтар сабақтастығының рухын ұялатты.